مشاكلنا مع ابوي .. افكر برفع قضايا عليه
السلام عليكم
انا شاب عمري 21 سنة طالب بجامعة الكويت .. امي وابوي متطلقين من سنة 97 وابوي تزوج على طول وامي بعدها بفترة تزوجت اهيا بعد .. وعندي اختين من امي وابوي وحده اكبر مني والثانية اصغر مني .. ومن زواج امي سنة 2002 واحنا عايشين مع ابوي وزوجته بنفس البيت .. البداية كان البيت مقسوم احنا لنا فوق واهما تحت .. لكن ابوي ماعجبه هالحال وطمع بالبيت كله قام افتحه كله على بعض ومن وقتها ابتدت المشاكل ....
مشاكلنا مع زوجته كل يوم تزيد واهيا مشكلجية وماعندها شغل غيرنا انا وخواتي .. وابوي لا حياة لمن تنادي .. علطول الخط واقف مع زوجته ودائماً بنظره احنا الغلطانين بكل المشاكل .. يعني زوجته من غير مناسبة .. تيي وتطق علي الباب وتسبني وتحاول تتهجم علي بغرفتي لما اكون انا بروحي بالبيت وتحاول تستفزني عشان امد ايدي عليها بس الحمدلله عمري ماسويتها .. وكنت اكتفي بسبها وشتمها فقط لانها اهيا اللي كانت تبلش .. ومرة من المرات تهجمت علي ورحت المخفر قالولي لازم نفتح محضر وراح ندز دوريات للبيت ياخذونها وبصراحة وقتها ماكنت حاب الفضايح وكان للحين عندي أمل ولو بسيط فأبوي لكن مع الاسف هالامل تلاشى وابوي يوم بعد يوم يثبت ان "سكانه مرته"
والحين طفح الكيل والموضوع زاد عن حده .. مرت ابوي صارت تهدد خواتي بإخوانها تخيلو .. وكل سالفة والثانية تهدد اختي الكبيرة انها تييبلها اخوانها يسحبونها من شعرها ومن هالكلام .. وانا هالموضوع مخليني مينون شلون وحده تهدد خواتي بهالشكل مافي ريال عنده غارية يرضى على خواته .. وابوي طبعاً اذا الطوفة حست اهوا يحس .. بس انا رجولتي ذابحتني وغاريتي اكثر وحاس دمي فاير من هالموضوع وكل ما اسمع هالحجي من خواتي احس ودي اروح اخنقها بإيدي عشان احسس خواتي بالأمان .. وابوي طبعاً لا حياة لمن تنادي
وابوي عشان يرضي مرته .. بطل يصرف علينا لا انا ولا اختي الصغيرة "اختي الكبيرة موظفة ماتحتاج" وحتى ماجلة البيت ماقام يحسب حسابنا فيها .. والوالدة شايلة حساباتنا كلها .. حتى السيارة اهيا اللي شاريتها لي
واهوا مايدفع ولا حتى ربع دينار لنا .. لا حق دراسة ولا حق عيد ولا حق صيف ولا حق شتا ولا شي بالمرة
ومؤخراً منع حتى الخدم انهم يشتغلونلنا بالبيت وقالهم اللي تشتغل حقنا راح اخصم من راتبها والخدم طبعاً خايفين على رواتبهم وسامعين كلامه
وكل شوي والثانية يهددنا ان بيطردنا من البيت .. واحنا ماعندنا مكان نروحله غير بيتنا!!
بصراحة انا قاعد افكر بشكل جدي اني انا واختي الكبيرة نرفع عليهم قضايا اهوا ومرته
اول قضية ان مرته تهدد خواتي ان تييبلهم اخوانها يتهجمون عليهم بالبيت
ثاني قضية مرته تتعمد التهجم علي بغرفتي لما محد يكون بالبيت غيري
ثالث قضية اطالب فيها ابوي ان يقسم البيت بينا وبين مرته لان انا عندي خوات واهيا كل سبوع منادية واحد من اخوانها البيت ومدخلتهم علينا لا احم ولا دستور
رابع قضية اطالب ابوي ان يتحمل مسؤوليتنا المادية انا واختي الصغيرة من خلال مصروفاتنا وان يوفرلي سيارة من فلوسه
وابي اطالب بحقنا من البيت ومحد يقدر يهددنا بالطرد كل شوية نبي نحس بالاستقرار خصوصاً ان انا طالب وجامعي وهالامور قاعده تشوش علي وايد
للعلم ان بيتنا عبارة عن طابقين وسرداب .. وهالبيت هذا كله مرت ابوي مستولية عليه مع موافقة من ابوي .. واحنا بالبيت كله مالنا الا غرفتين .. غرفة لي انا .. وغرفة لخواتي الثنتين
واهيا حتى السرداب قافلته ومو من حقنا نستخدمه او نستخدم أي شي ثاني بالبيت .. وهذا كله مو كافيها كل شوي تهددنا انها بتطردنا من البيت
وللعلم ان ابوي عنده من مرته الثانية يهال ويصرف عليهم وموفرلهم كل شي
وعلى فكرة حاولنا معاه بكل الطرق .. كلمانه بالود وكلمناه بالاحترام وكلمنا عماتي عشان يكلمونه بس اهما واقفين معاه واهوا واقف مع مرته يعني جربنا كل شي .. وصدقوني مافكرت بموضوع القضايا الا لما شفت ان الطريج صار مسدود جدامي ومابيدي شي اسويه
ياريت تفيدوني وتعلموني اذا لي حق او لا ..
وسامحوني ماقدر اذكر اسمي للخصوصية .. ويعطيكم العافية
|
آخر 10 مشاركات
العرض العادي
